Stavanger Brass Band vil til topps
Blir det ein EM brass-meister frå Norge i år? Stavanger Brass Band (SBB) kan denne helga hente heim tittelen, men fyrst skal det konkurrerast. I dag, fredag spelar SBB og alle dei 12 korpsa det same pliktnummeret. I morgon er det sjølvvald nummer som gjeld. Det heile skjer i Lille i Frankrike.
– Målet er å hevde oss i toppen. Det kan vi absolutt gjere om vi har ein god dag, seier Stine Lillesund som er leiar av musikkutvalet i SBB.
Målet er å hevde oss i toppen, Stine.
Krevande og kjekke stykke
Årets pliktnummer er eit nyskrive verk med tittelen «Fraternity» av komponisten Thierry Deleruyelle. Eit stykke med inspirasjon frå ei av Europas største gruveulukke i Lens i Nord-Frankrike i 1906. Kva sjølvvald verk dei skal framføre er ikkje offentleg. Det er lukka bedømming i EM der dommarane sit bak forheng for å ikkje vite kven som spelar.
– Stykka vi speler er krevande, men utruleg kjekke og publikumsvennlege. Ho trur på ei god steming i salen.
Stine Lillesund i SBB er leiar av musikkutvalet. Foto: Privat
Eit svært godt korps
Totalt 50 personar frå SBB er i Lille Frankrike på EM brass. Blant medlemmene finn vi profesjonelle musikarar, musikkstudentar og særleg flinke amatørar, 35 i talet. SBB har i mange år vore eit av Europas leiande brassband og den posisjonen ønskjer dei å halde på.
Tøff konkurranse
EM er ein av dei tøffaste konkurransane for brassband og du kjem dit etter å ha blitt best i Norge. I år tapte dei fyrsteplassen med knappast mogeleg margin, men i fjor (2015) vart dei norgesmeister.
– Uansett skal vi levere to fantastiske konsertopplevingar og til sjuande og sist er det dommarane i boksen som bestemmer, seier Lillesund. Ho gler seg veldig til meisterskapen saman med alle dei andre.
– Vi har ikkje spelt i EM sidan 2008, så dette er ei stor bragd for korpset. Vi har verkeleg kjempa dei siste åra for å kome dit vi er i dag, og det er vi stolte over.
Vi har verkeleg kjempa dei siste åra for å kome dit vi er i dag, og det er vi stolte over, Stine
Konkurrerer mot Cory og Black Dyke
Eli Hatlehol spelar 2. kornett i SBB og var også med til EM i fjor, men då med European Youth Brass Band (EYBB). Ho gler seg skikkeleg.
– Det er veldig stort for meg å skulle konkurrere mot band som Black Dyke og Cory Band, og eg er svært spent på kvar vi kjem til å plassere oss. Men alle er innstilte på å vinne. Og så gler eg meg skikkeleg til å spele for ein fullsett sal med brassband-nerdar frå Heile Europa. Eg håpar stemninga i salen og rundt arrangementet blir minst like god som i fjor. For meg blir det ein heilt annleis tur når eg faktisk skal vere med å konkurrere sjølv.
Eli Hatlehol er ein av 35 musikarar som konkurrerer i EM brass 2016. Foto: Privat
Det er veldig stort for meg å skulle konkurrere mot band som Black Dyke og Cory Band, Eli
Til vanleg studerer Hatlehol klassisk utøvande musikk, og øver mykje. Ho gir dirigentane stor ære for å hente ut det beste i musikarane.
Vi speler krevande stykke og folk jobbar kjempehardt både individuelt og i grupper for å få det til å lyde bra. Dirigentane jobbar nøye med detaljar som må på plass, og det har gjort at korpset har vakse mykje i denne oppkøyring.
Hardt arbeid
Allan Withington er sjefdirigenten og dirigerer dei i meisterskapen, og Stian Svendsen har hatt ei vesentleg rolle i heile oppkøyringa. Kvar tysdag og torsdag har dei faste øvingar og før denne meisterskapen har dei hatt tre øvingshelgar i tillegg til øving kvar dag dei siste to vekene.
Vi kan berre seie LYKKE TIL!
Portrett: Sindre Skjøld i SBB
Pliktnummeret i EM fredag og det sjølvvalde stykket laurdag blir streama.
Tertnes Skoles Musikkorps deltek i EM brass, development section.
